Bakının Xətai rayonunda bəzi küçələr bərbad vəziyyətdədir. Bu haqda bu gün, 22 mart tarixində Bakuplus.az Oxu.az-a istinadən xəbər verir.
Elvin Şükürlü küçəsinin bir hissəsi və Əhmədli kəndinin Babək prospekti tərəfdən girişi keçilməz vəziyyətdədir.
Sakinlərin sözlərinə görə, rayonun Elvin Şükürlü və Polad Həşimov küçələrinin kəsişməsinin bir hissəsi təmir olunsa da, qalan hissəsinə toxunulmayıb.
Qurumlar isə küçənin gah yaxın vaxtlarda, gah da ilin sonuna qədər abadlaşdırılacağını vəd edir.
Oxşar vəziyyət Əhmədli kəndinin Babək prospekti tərəfdən girişindədir.
“Həm asfalt problemi, həm də qarajların qarşısında təmir üçün saxlanılan avtomobillər gediş-gəlişə çətinlik yaradır”, – deyə paylaşımda bildirilib.
Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli deyib ki, qurumun balansında belə yollar yoxdur.
Xətai Rayon İcra Hakimiyyəti isə məsələ ilə bağlı açıqlama verməyib.
