Bakının Xətai rayonu, İnqilab İsmayılov küçəsi, 5 ünvanında iki qonşu illərdir mənzili bölə bilmir. Bu haqda bu gün, 22 noyabr tarixində Bakuplus.az ARB Xəbər-ə istinadən xəbər verir.
Sözügüdən ərazidə yaşayan Əsmər Həsənovanın sözlərinə görə, mənzilinə bitişik 8 kv.m sahədə olan mənzili 2007-ci ildə qanuni olaraq özəlləşdirib və sonra mənzil kimi istifadə etmək üçün lazımi sənədləri alıb. Lakin onun qonşusu Yalçın Mərdiyev 2014-cü ildə həmin obyekti qıfıllayaraq qeyri-qanuni zəbt edib.
Ə. Həsənova əlavə edib ki, həmin hissədə daha əvvəl mətbəx yerləşib. Mənzilə gələn qaz və su boruları da oradan keçir. İndi isə evində çətinlik çəkir.
Yalçın Mərdiyev isə deyilənləri təkzib edir. O bildirir ki, Əsmər Həsənova həmin mənzili qanunsuz özəlləşdirib. Həmin sahə uzun illərdir Mərdiyevə məxsus olub.
“20 dəfə məhkəmə olub. Orada da sübut olunub ki, sahə bizimdir. Biz 1984-cü ildən orada yaşayırıq. Əsmər isə sonradan gəlib obyekti mənimsəmək istəyir”, – deyə Yalçın Mərdiyev qeyd edib.
Burada yaşayan digər sakinlər də Mərdiyevin sözlərini təsdiqləyiblər.
Xətai RİH-dən məlumat verilib ki, 1-ci mərtəbədə yerləşən qeyri-yaşayış sahəsinin mübahisəli hissəsi Yalçın Mərdiyevin atası İslam Mərdiyevə məxsusdur.
