Bakının Xətai rayonu, Gəncə prospektində yerləşən 3 evin - 95, 97 və 111 saylı binaların sakinləri həm öz həyatlarından, həm də övladlarının həyatından narahatdırlar. Uzun illərdir ki, yaşayış binalarının qarşısındakı həyətlərin ərazisindən avtomobil yolu kimi istifadə olunur. Bu haqda bu gün, 17 fevral tarixində Bakuplus.az Oxu.az-a istinadən məlumat verir.
Sakinlərin sözlərinə görə, bütün maşınlar, hətta yol polisinin xidməti maşınları da evin yanından kifayət qədər yüksək sürətlə keçir. Həmçinin onlar iddia edirlər ki, həyətlərdə ölümlə nəticələnən bir neçə qəza olub.
Sosial şəbəkələrdə yayılan kadrlarda binadan qaçaraq mağazaya tərəf gedən uşağın maşın tərəfindən az qala vurulduğu da görünür.
Meydança olmadığından uşaqlar özlərini təhlükəyə ataraq yolun yaxınlığında oynamaq məcburiyyətində qalırlar.
Özünü qəzalardan qorumaq üçün yerli sakinlər yola tramplinlər qoyublar. Bu, ölümcül vəziyyətlərin qarşısını almağa kömək edir.
Dəfələrlə müxtəlif dövlət qurumlarına müraciət olunsa da, həyətlərdə təhlükəsizlik məsələsi hələ də həllini tapmayıb.
