Bakının Xətai rayonu, UPD qəsəbəsi (NZS qəsəbəsi), Yavər Əliyev küçəsində yaşayan sakinlər neçə ildir ki, asfaltsız qalırlar. Bu haqda bu gün, 24 noyabr tarixində Bakuplus.az ATV Xəbər-ə istinadən məlumat verir.
Məhəlləni qışda palçıq, yayda isə toz bürüyür. Bununla yanaşı, ərazidə zibil qutuları kifayət qədər olmadığına görə antisanitar vəziyyət hökm sürür. Vətəndaşlar dəfələrlə müvafiq qurumlara müraciət etsələr də, heç bir nəticə əldə olunmayıb.
Ərazidəki problemlə bağlı Xətai Rayon Mənzil Kommunal Təsərrüfatı Birliyindən bildirildi ki, əksər hallarda bəzi məsuliyyətsiz sakinlər tullantılarını zibil qutusuna deyil, ətrafa atırlar. Buna baxmayaraq, əraziyə daha 3 zibil qutusu quraşdırılıb.
Yolun vəziyyətinə gəlincə Xətai Rayon İcra Hakimiyyətindən qeyd olundu ki, burada yolların əsaslı təmir edilməsi ilə bağlı aidiyyəti qurumlara müraciət edilib və problem ilin sonuna qədər həll olunacaq.
