Paytaxtın Xətai rayonu, Oksigen küçəsində yerləşən binalardan biri qəzalı vəziyyətdədir. Bu haqda bu gün, 18 fevral tarixində Bakuplus.az Xəzər Xəbər-ə istinadən məlumat verir.
Binanın divarları çöldən dəmir konstruksiyalar ilə bərkidilib, ancaq çatların qarşısını almaq mümkün olmur. Sakinlər tikilinin hər an uça biləcəyindən narahatdırlar.
“FHN-in komissiyası gəlib aktını yazıb, Bakı şəhər İcra Hakimiyyəti də deyir ki, ona görə gözləyin sizə ya kompensasiya verilər, ya mənzil. Nə qədər gözləmək olar?”, - deyə sakinlərdən biri öz narazılığını bildirib.
Sakinlərdən bəziləri isə 20 ildən artıqdır başqa yerdə məskunlaşıblar.
“Hazırda yarımçıq tikilmiş göz xəstəxanası var, qaçqınlar qalan bina, orada yaşayırıq”, - deyə digər sakin bildirib.
Məsələ ilə əlaqədar Bakı Şəhər İcra Hakimiyyətindən bildirildi ki, qəzalı binaların sökülməsi və sakinlərin yerləşdirilməsi Nazirlər Kabinetinin müvafiq qərarından asılıdır. Yəni sakinlər həmin qərarı gözləmək məcburiyyətindədir.
[caption id="attachment_34069" align="alignnone" width="800"] screen Xəzər Xəbər[/caption]
