Xətai rayonu, Məhəmməd Hadi küçəsində qurumuş ağac təhlükə saçır. Bu haqda bu gün, 3 may tarixində Bakuplus.az Real TV-yə istinadən xəbər verir.
Belə ki, adıçəkilən ərazidə yerləşən ağacın 1 əsrdən çox yaşı var. Sakinlərin sözlərinə görə, son 1 ildə ağac qəzalı vəziyyətdədir. Bu da yaxınlıqda olan yaşayış binası və buradan keçən insanlar üçün ciddi təhlükə yaradır.
“Həyətdən keçmək mümkün deyil. Maşınlara ziyan dəyir, insanlara çox ziyan dəyir. Bir neçə dəfə hadisə baş verib, budaqlar sınıb və maşınlara ziyan dəyib”, – deyə sakinlər şikayət edirlər.
Onlar bir neçə dəfə rəsmi qurumlara müraciət etdiklərini, ancaq heç kimin addım atmadığını bildiriblər.
Bakı şəhər Yaşıllaşdırma Təsərrüfatı Birliyi və Dövlət Ekoloji Ekspertiza Agentliyi məsələ ilə bağlı bildirib ki, onlara problemlə bağlı müraciət olunmayıb. Rəsmi müraciət olunacağı təqdirdə müvafiq addımlar atılacaq.
