Xətai rayonu, General Şıxlinski küçəsində yerləşən binanın tikintisi 14 il ərzində yarımçıq qalıb. Bu yarım tikili narkotik istifadəçilərinin məskəninə çevrilib. Yaxınlıqda uşaq bağçası da fəaliyyət göstərir. Bu haqda bu gün, 26 aprel tarixində Bakuplus.az İTV-yə istinadən məlumat verir.
Ərazinin dörd bir yanı yaşayış məntəqəsi ilə əhatə olunub. Hətta çox vaxt uşaqlar burada asudə vaxtlarını da keçirirlər. Sakinlərin sözlərinə görə, yarım tikili vaxtilə binanın tikilməsi üçün nəzərdə tutulmuşdu, amma sakinlərin çoxsaylı şikayəti əsasında tikinti işləri dayandırılıb.
Məsələ ilə bağlı Xətai Rayon İcra Hakimiyyətindən (RİH) bildirdilər ki, bu barədə məlumatlıdırlar, artıq sahibkara xəbərdarlıq da edilib. RİH-dən onu da vurğuladılar ki, ərazi hasarlanacaq və bundan sonra həmin yerdə polis nəzarəti gücləndiriləcək.
