Xətai rayonunda yerləşən “Amay” ticarət mərkəzinin binası vətəndaşlara təhlükə yaradır. Bu haqda bu gün, 9 may tarixində Bakuplus.az ATV-yə istinadən xəbər verir.
Bir müddət əvvəl adıçəkilən ticarət mərkəzinin fasadının daş örtüyünün bir hissəsi qoparaq avtomobillərin üzərinə düşüb və onlara ziyan vurub. Ticarət mərkəzinin içərisində 2 saylı “ASAN Xidmət”in yerləşdiyinə görə, ərazidə hərəkət intensivliyi yüksəkdir. Hazırda səkidə hərəkət məhdudlaşdırılıb.
“Amay” ticarət mərkəzinin nəzarətçisi Çingiz Fətullayevdən verilən məlumata görə, ərazidə parklanan nəqliyyat vasitələrinə görə təmir işləri aparmaq mümkün olmur. Həmçinin bəzi avtomobillər uzun müddətdir ki, burada park edilib və sahiblərini tapmaq olmur.
Xətai Rayon İcra Hakimiyyətindən isə bildirilib ki, ticarət mərkəzinin rəhbərliyinə problemi qısa zamanda həll etmələri üçün göstəriş verilib.
