Xətai rayonunda çoxmərtəbəli binada lift işləmir. Bu haqda 6 aprel tarixində ATV xəbər verib.
Gəncə prospektində yerləşən 16 mərtəbəli binada xeyli vaxtdır lift işləmədiyindən, sakinlər pilləkənləri qalxmamaq üçün qəribə çıxış yolu tapıblar. Onlar hər gün binanın damına qalxıb oradan öz blokuna keçərək pilləkənlə aşağı mərtəbələrə enir. Sakinlər digər blokun şaxtasına daxil olurlar və öz mənzillərinə gedirlər. Səbəb isə uzun illərdir binanın 4-cü blokunda liftin işləməməsidir. Uşaq, böyük, qoca, bir sözlə hər kəs eyni üsuldan istifadə edir. Bu isə onların həyatları üçün təhlükə yaradır.
Araşdırma zamanı məlum olub ki, binanın idarəçiliyini bir ilə yaxındır ki, sakinlər həyata keçirir. Burada sakinlərin birgə razılığı əsasında Mənzil Mülkiyyətçilərin Müştərək Cəmiyyəti yaradılıb.
“Dəfələrlə mühafizə təyin edirik, qapı qoyuruq. Və buna baxmayaraq damın üstündən yenə də hərəkət edirlər. Hətta qapını söküb yerindən çıxarıblar ki, biz oradan hərəkət etmək istəyirik. İtaliyanın istehsalı olan motor alınıb, dünən bütün günü ustalar işləyib quraşdırırdılar. Sadəcə elektrik sistemi qalır. İnşallah qoşulacaq və sakinlərin istifadəsinə veriləcək”, - problemin aqibəti barədə cəmiyyətin sədri Zamiq Ağahəsənov açıqlama verib.
