Xətai rayonu, Fəzail Bayramov küçəsi, 11/56 ünvanında sakinlər və sahibkar arasında qarşıdurma yaşanır. Bu haqda bu gün, 6 aprel tarixində Bakuplus.az Real TV-yə istinadən xəbər verir.
1000-dən artıq sakinin yaşadığı 24 mərtəbəli 4 bina “Sahil-D Company” tərəfindən 2016-cı ildə istifadəyə verilib. 2022-ci ilin yanvar ayından binaların idarəetməsi sakinlərin özləri tərəfindən yaradılan mənzil mülkiyyətçilərinin müştərək cəmiyyətinə verilib. Bura 462 mənzil və 50 ədəd qeyri-yaşayış sahəsi daxildir. Ancaq zirzəmidəki avtoyuma məntəqəsinin sahibi obyektini təhvil verməkdən imtina edir.
Sakinlərin sözlərinə görə, burada fəaliyyət göstərən avtoyuma məntəqəsi tikiliyə ciddi ziyan vurur. Bununla bağlı müvafiq qurumlar da rəy verib. Ancaq sahibkar ərazidən çıxmaqdan imtina edir. O, ərazidən çıxmaq üçün şərt qoyur:
“Mənə deyirlər: “Yer bizimdir”. Mən 200.000 pul tökmüşəm bura. Mən satıram. Amma bunlar məni heçnəsiz çıxmağa məcbur edirlər”, – deyə sahibkar Vüqar Mənsumov vurğulayıb.
Sakinlər isə qanunla bu halın mümkün olmadığını, Vüqara dəymiş zərəri binanın tikintisini həyata keçirən, zirzəmisinin bir hissəsini ona satan MTK sədri tərəfindən ödənməli olduğunu deyiblər. Məsələnin artıq məhkəməyə çatdığı da məlum olub.
