Bakının Xətai rayonunda birmərtəbəli evlər qanunsuz sökülür? Bu haqda bu gün, 8 may tarixində Bakuplus.az ARB Media-ya istinadən xəbər verir.
Yusif Səfərov küçəsi və Sergey Senyuşkin, 76-100 ünvanlarında yerləşən birmərtəbəli yaşayış evləri və obyektlərinin müqavilə olmadan sökülməsi planlaşdırılır. Sakinlərin sözlərinə görə, Xətai RİH Mənzil İstismar komitəsinin əməkdaşları xəbərdarlıq ediblər və qazıntı işlərinə başlayıblar.
“Bizə heç kim heç bir müqavilə təqdim etməyib, bizimlə qiymət danışmayıblar. Bilinmir, kim sökəcək, ancaq gəlib söküntü haqda xəbərdarlıq ediblər. Əraziyə icra başçısının müavini də gəlmişdi, ancaq o da bizə heç bir məlumat verməyib”, - deyə sakinlər şikayət edirlər.Xətai RİH-nin rəsmisi Pənah İmanov bildirib ki, adıçəkilən küçələrdə vətəndaşlara artıq xəbərdarlıq olunub.
“Həmin evlərin yerində yeni park salınacaq. Hazırda orada tikililərin ölçülməsi işləri aparılır”, – deyə RİH-nin əməkdaşı qeyd edib.
