Xətai rayonu Əhmədli qəsəbəsinin Nəsrəddin Tusi küçəsində yeni inşa edilən park baxımsız vəziyyətdə qaldığından bəzi attraksionlar yararsız vəziyyətə düşüb. Buna görə də azyaşlılar parkda əylənməyə yer tapmırlar. Bu haqda bu gün, 23 avqust tarixində Bakuplus.az ATV-yə istinadən məlumat verir.
Cəmi 4 ildir istifadəyə verilməsinə baxmayaraq, artıq parkdakı əksər attraksionlar sıradan çıxıb, bəziləri isə tamamilə sınıb. Ərazidəki yaşıllıqlara və təmizliyə müəyyən qədər diqqət göstərilsə də, attraksionlara nəzarət edən olmayıb.
Parkın nəzərətçisi bildirib ki, məsələdən xəbərdardırlar, yeni detallar artıq sifariş olunub.
Park nəzarətçisi əlavə etdi ki, sakinləri narahat edən məsələ ilə bağlı rəhbərliyə yenə də məlumat verəcək. Onun sözlərinə görə, bu məsələdə valideynlər də diqqətli olmalı, uşaqların attraksionlarla düzgün qaydada davranmalarına nəzarət etməlidirlər.
