Xəzər rayonunun Mərdəkan qəsəbəsində təxminən 3-4 ay əvvəl su təchizatı sisteminin çəkilməsi üçün asfalt sökülmüşdür. İş başa çatdıqdan sonra qırılan asfalt hələ də yenisi ilə əvəz edilməmişdir. Bu barədə Xəzər Xəbər reportaj paylaşıb.
Rafael Cəfərov küçəsinin sakinlərinin sözlərinə görə, yolun vəziyyəti həm piyadalar, həm də avtomobillər üçün problem yaradır. Xüsusilə yağışlı hava zamanı yolda sel yaranır, küçəyə girmək mümkün olmur. Vətəndaşlar Azərsu ASC-yə müraciət etsələr də, idarə tərəfindən heç bir tədbir görülməyib. Bundan əlavə, onlar iddia edirlər ki, su xətti hələ ki evlərinə çəkilməyib.
Məsələ ilə bağlı Azərsu-nun mətbuat xidmətinin rəhbəri Anar Cəbrayıllı Xəzər xəbərə açıqlamasında problemdən xəbərdar olduqlarını bildirib. O, qeyd edib ki, ərazidə 1200 metr su xətti çəkilib. Yolun asfaltlanması ilə bağlı artıq Yol Təsərrufatına müraciət edilib və yaxın zamanlarda həmin ərazidə tikinti işləri aparılacaq.
