Xalça Muzeyində könüllülük proqramı start götürür. Bu haqda bu gün, 25 iyun tarixində Bakuplus.az Azərbaycan Xalça Muzeyinə istinadən xəbər verir.
Könüllü fəaliyyəti ali və orta ixtisas müəssisələrində xalçaçılıq, rəssamlıq, bələdçi, bərpaçı, tərcüməçi, beynəlxalq əlaqələr və s. kimi ixtisaslar üzrə təhsil alan və ya təhsilini bitirmiş 18-28 yaş arası gənclər üçün təşkil olunur. Könüllülər həftənin 5 günü səhər (09:00-14:00) və günorta (14:00-19:00) növbələri üzrə fəaliyyət göstərəcəklər.
Muzey işinə, xalça sənətinə maraq göstərən gənclər 2 ay (1 iyul – 1 sentyabr) davam edəcək proqrama qoşulmağa dəvət edilirlər.
Namizədlərdən Azərbaycan, ingilis, rus dili bilikləri, kreativ düşünmə, intizamlı, məsuliyyətli, operativ, ünsiyyətcil və mehriban olmaq, kollektivlə işləmək bacarığı tələb olunur.
Könüllülük müddətində iştirakçılar muzeyin müxtəlif şöbələrinin təcrübəli əməkdaşları ilə birlikdə çalışaraq bilik və bacarıqlarını artıracaq, peşə vərdişlərinə yiyələnəcək, gələcək karyeraları ilə bağlı yeni fürsətlər yaratmaq şansı qazanacaqlar.
Müqavilə öhdəliklərini uğurla yerinə yetirən hər kəsə sertifikat və xasiyyətnamə veriləcək.
Azərbaycan Milli Xalça Muzeyinin könüllüləri sırasına qoşulmaq istəyirsinizsə, mövzu hissəsində “Könüllü proqramı” yazmaqla mail@azcarpetmuseum.az elektron ünvanına CV göndərmək mümkündür.
Əlavə məlumat üçün əlaqə: (+994) 12 497 20 16
