Tarixi Şollar su kəmərinin 19-cu əsrə aid su yayma qülləsi yararsız vəziyyətdədir. Abidənin divarları uçub, çatlar əmələ gəlib. Bu haqda bu gün, 19 iyul tarixində Bakuplus.az Baku TV-yə istinadən məlumat verir.
Abidənin ətrafı da acınacaqlı vəziyyətdədir və xarabalıqları xatırladır. Ehtimal olunur ki, abidənin qəzalı vəziyyətə düşməsinin səbəbi bu ərazidə aparılan tikinti işləridir.
Tarixi obyektin durumu ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli münasibət bildirib.
“Tikintinin getdiyi müddətdə mühafizə tədbirlərinin gücləndirilməsi məqsədilə abidənin ətrafı hasarlanıb. Eyni zamanda, abidənin qorunması ilə bağlı tikinti aparan şirkətlə görüş keçirilib və işlər bitdikdən sonra abidənin ətrafının abadlaşdırılması vacibliyi diqqətə çatdırılıb”, - mətbuat katibi bildirib.
Su yayma qüllələri Hacı Zeynalabdin Tağıyevin göstərişi ilə Şollar su kəmərinin çəkilməsi ilə əlaqədar tikilib. Bakı sakinləri suyu vedrələrlə qüllənin üzərinə quraşdırılmış kranlardan yığıblar. Oxşar qüllələrdən keçən əsrin ortalarına qədər istifadə edilmişdir.
