Bakının Bilgəh və Nardaran qəsəbələrinin sakinləri çətin vəziyyətə düşüblər. Problem bir neçə ay əvvəl ərazidə su borularının çəkilməsi işlərinə başlanılan zaman yaranıb. Bu haqda bu gün, 12 iyul tarixində Bakuplus.az APA TV-yə istinadən məlumat verir.
Artıq işlərin bir hissəsinin yekunlaşdığına baxmayaraq, dağılmış asfalt örtüyü hələ də bərpa olunmayıb. Bu isə yerli sakinlər və gündəlik olaraq bu yoldan istifadə etmək məcburiyyətində qalan sürücülər üçün ciddi çətinliklər yaradır.
Yerli sakinlərin sözlərinə görə, yolun bərbad vəziyyətdə olması artıq bir neçə yol qəzasına səbəb olub. Vəziyyət öz təhlükəsizliyindən qorxan əhali arasında ciddi narahatlıq yaradır.
Məsələ ilə bağlı “Azəravtoyol”dan bildirilib ki, işlər “Azərsu” tərəfindən aparılıb, bu səbəbdən asfaltın yenilənməsi qurumun səlahiyyətində deyil.
“Azərsu” ASC-dən məlumat verilib ki, qeyd olunan ərazidə içməli su şəbəkəsinin yaradılması işləri artıq yekunlaşıb. Hazırda xətlərin istismar vəziyyətinin yoxlanılması üçün sınaq rejimində suyun verilməsinə başlanılıb.
Bütün lazımi işlər başa çatdıqdan sonra problemin dərhal həll olunacağı bildirilib. Lakin yol örtüyünün bərpası üçün konkret vaxt çərçivələri açıqlanmayıb.
