YARAT İncəsənət Mərkəzində yeni sərgi açılır. Bu haqda bu gün, 6 iyun tarixində Bakuplus.az mədəniyyət ocağına istinadən xəbər verir.
Belə ki, Aydan Salahovanın Bakıda ilk irimiqyaslı “Sükutun səsləri” adlı fərdi muzey sərgisi və 7 fərqli rəssamla müxtəlif illərdə əməkdaşlıq çərçivəsində ərsəyə gələn “Müşahidə olunmayan arzular” adlı qrup sərgisi keçiriləcək.
Aydan Salahovanın layihəsində məişət zorakılığının emosional mənzərələrini araşdıraraq qurbanların qorxuları və ümidsizliyi vurğulanır. Ekspozisiyada aqlay daşından yonulmuş 12 nəhəng küpdən ibarət instalyasiya təqdim olunur və bu, sənətçinin yerli daşla əsərlər yaratmaqda ilk təcrübəsidir.
Qrup sərgisi isə yerli rəssamlar Zamir Süleymanov, Emin Əzizbəyli, Şəlalə Salamzadə, Rəsul Quliyev, həmçinin gürcü rəssamı Vaciko Çaçxiani, italiyalı rəssam Ritz Mone və almaniyalı rəssam Timo Herbstin videoəsərlərini bir araya gətirir. Sərgi sürətli dəyişikliklər və gözlənilməz çağırışlarla zəngin olan müasir dünyada sosial dəyərlərin və iqtisadi rifahın hansı şərtlərdə böhranlarla əvəz olunduğunu və bu dəyişikliklərin cəmiyyətin fərqli təbəqələrinə necə təsir etdiyini araşdırır.
Sərginin açılışı 13 iyun saat 19:00-da baş tutacaq. Giriş sərbəstdir.
