Bakının Yasamal rayonu, Məhəmməd Xiyabani küçəsində yerləşən yaşayış binalarının həyətlərində köhnə qarajlar sakinləri narahat edir. Həyətdəki bəzi tikililərin istifadəyə yararsız olduğu qeyd edilir. Bu haqda bu gün, 9 yanvar tarixində Bakuplus.az Baku TV-yə istinadən məlumat verir.
Yerli sakinlərin sözlərinə görə, 1994-cü ildən yaranmış vəziyyət dəyişməyib.
“Həyətin ortasını qarajlarla doldurublar. Uşaqlar üçün oynamağa yer yoxdur. İnanmıram ki, buradan bərbad həyət dünyanın harasındasa olsun”, – deyə vətəndaşlardan biri vurğulayıb.
Yasamal Rayon İcra Hakimiyyətindən (RİH) bildirilib ki, bu həyətdəki köhnə qarajlar 1992-1993-cü illərdə bu ərazidə məskunlaşmış məcburi köçkünlər tərəfindən tikilib. “Bu binalara görə abadlıq işlərinin aparılması texniki cəhətdən mümkün deyil. Buna baxmayaraq, RİH başçısının tapşırığı ilə bir neçə ay öncə həyətdə oturacaqlar quraşdırılıb. Abadlıq işlərinin aparılması üçün RİH tərəfindən müvafiq addımlar atılacaq”, – məlumatda deyilir.
Süjetdə bildirilir ki, yeni müasir tipli oturacaqların quraşdırıldığı bildirilsə də, çəkiliş zamanı həyətdə həmin oturacaqlar tapılmayıb.
Ətraflı videoda:
