Bakının Yasamal rayonu, Dağlı küçəsində sakinlər tikinti işlərini həyata keçirən şirkətdən şikayətçidirlər. Bu haqda bu gün, 19 yanvar tarixində Bakuplus.az Baku TV-yə istinadən xəbər verir.
Sakinlərin sözlərinə görə, burada evlərin bir hissəsi sökülüb, qonşular köçürülüblər, yeni binanın tikintisi başlanıb. Binanın tikinti işləri başladıqdan sonra ərazidə hələ də qalan vətəndaşların yaşayış şəraitləri çətinləşib.
“Hərdən olur ki, işlər gedən zaman işıq xəttini kəsirlər, qaz xəttini kəsirlər. Düzdür, tezliklə də bərpa edirlər, amma onun da ayrı narahatlığı var”, – deyə sakinlərdən biri şikayət edib.
Əlavə olaraq, sakinlər səs-küydən narazıdırlar. Onların iddialarına əsasən, inşaat prosesi gecə saatlarında da davam edir.
Həmin küçədə yeni tikilini inşa edən “Lux Residence”in direktoru Rafael Mirzəyevin verdiyi məlumata əsasən, şirkətin şərtləri ilə razı olmayan sakinlərlə danışıqlar aparılıb. Lakin müəyyən vətəndaşlar tərəfindən müvafiq razılaşmaya uyğun olmayan şərtlər irəli sürülür. Şirkət tərəfindən onlara mənzillərin mövcud sahəsinin üzərinə əlavə 20 faiz və yaxud daha çox artırılması, təmirli mənzillə və kirayə haqları ilə təmin olunması təklif olunur.
Rafael Mirzəyev bildirib ki, tikinti işləri bitəndən sonra sakinlər gələn il ərzində təzə mənzillərinə köçürüləcəklər. Əlavə olaraq, aparılan tikinti işlərinin bütün normativlərə və təhlükəsizlik qaydalarına düzgün riayət olunduğu qeyd olunub.
