Paytaxtın Yasamal rayonu, Süleyman Dadaşov, 70A ünvanında kanalizasiya daşaraq mənzilə dolub. Bu haqda bu gün, 5 dekabr tarixində Bakuplus.az Baku TV-yə istinadən xəbər verir.
Adıçəkilən ünvanda yerləşən beşmərtəbəli binanın 2-ci mərtəbəsində kanalizasiya suyu mənzilin hamam və mətbəxinə daşır.
“Artıq 1 ayda 5-ci dəfədir biz nəcis yuyuruq. Səhər durub bu vəziyyəti gördükcə mən nə hallara düşürəm. Hamam bir yana dursun, mətbəxdən qalxır o zir-zibil, nəcislər”, - deyə sakinlərdən biri şikayət edir.
Onların sözlərinə görə, Sukanal İdarəsindən məsələni ancaq müvəqqəti həll edirlər:
“Məftili salırlar ora. “Hə, açılıdı” deyib gedirlər. Sonra eyni hal təkrar olur. Tamamilə təmizlənmir”.
Qurumdan isə məsələ ilə bağlı vurğulayırlar ki, sakinlər kanalizasiya sistemindən düzgün istifadə etmirlər, bu səbəbdən də borular dözmür.
