Paytaxtın Yasamal rayonundakı məhəllələrdə uşaq meydançalarının əksəriyyəti baxımsız vəziyyətdədir. Bu haqda bu gün, 30 dekabr tarixində Bakuplus.az ATV Xəbər-ə istinadən məlumat verir.
Uşaq meydançalarında quraşdırılan attraksionların çoxu sovet dövründən qaldığından yelləncəklərin qurğuları qırılıb. Qırılmayanlar isə pas atıb, rəngi gedib.
Yasamal rayonu, Ələsgər Ələkbərov, 528-ci məhəllə və İsmayıl Talıblı küçəsində olan meydançada uşaqlar hər gün bu mənzərə ilə qarşılaşırlar. Sakinlər deyirlər ki, attraksionlar sındığından məcbur olub uşaqları digər məhəllələrə aparırlar.
Yasamal Rayon Mənzil Kommunal Təsərrüfatı Birliyinin baş mühəndisi Fəxri Hüseynov deyir ki, problemdən onların da xəbəri var. Bir neçə belə vəziyyətdə olan həyət var ki, gələn il onlarla bağlı müvafiq tədbirlər görüləcək: “Sovet dövründə quraşdırılmış elementlərdir, onlar, demək olar ki, vaxtını başa çatdırıb. Qarşıdan gələn ildə rayon ərazisində çoxsaylı ünvanlarda abadlıq işlərinin aparılması nəzərdə tutulub. Bu abadlıq işləri mərhələli şəkildə həyata keçiriləcək və qeyd etdiyiniz ünvanlarda köhnə attraksionlar müasirləri ilə əvəz ediləcək”.
Fəxri Hüseynov vəd verdi ki, sözügedən ünvanlarda - Ələsgər Ələkbərov, 528-ci məhəllə və İsmayıl Talıblı küçəsində yaşayan uşaqlar 2023-cü ildə yeni attraksionlardan istifadə edə biləcəklər.
[caption id="attachment_85377" align="alignnone" width="640"]
Foto ATV-nin rəsmi Youtube kanalı[/caption]
