Yasamal rayonunun bir hissəsinə hələ də istilik verilməyib. Bu haqda bu gün, 22 noyabr tarixində Bakuplus.az AzTV-yə istinadən xəbər verir.
Yasamal rayonu ərazisində köhnə yaşayış binalarının bəzilərində mənzillərə istilik bu günə kimi verilməyib. Seyfəddin Dağlı küçəsində sakinlər mövsümə hazırlaşıblar, yeni təchizat quraşdırıblar, ancaq daha sonra istiliyin verilməyəcəyini eşidiblər.
“Elektrik sobası ilə evi qızdırırıq. Aylıq xərcimiz çox çıxır. Bizə deyirlər ki, gedin, öz hesabınıza sistemi bərpa etdirin”, – deyə sakinlər şikayət edirlər.
Mərkəzləşdirilmiş kitabxana sisteminin 4 saylı filialı da istilik üzünə həsrətdir. Süleyman Dadaşov və Həsən bəy Zərdabi küçələrində yerləşən bəzi binalarda da eyni vəziyyət hökm sürür.
Qazanxanadan məsələ ilə bağlı bildirilib ki, magistral xətt qəzalı olduğuna görə, həmin binaya xəbərdarlıq edilib və istilik verilməyəcək. Bundan əlavə, bina sakinlərinin borcu var. “Azəristilktəchizat”dan isə araşdırma aparılacağı qeyd olunub.
