Bakının Yasamal rayonu, Yeni Yasamal 2 yaşayış sahəsi, 10 ünvanında yaşayan sakinlərin sözlərinə görə, bina uzun müddətdir istifadəyə verilsə də, bu günədək orada lift quraşdırılmayıb. Onlar, hətta bununla bağlı dəfələrlə aidiyyəti qurumlara müraciət etdiklərini deyirlər. Ancaq problem hələ də öz həllini tapmayıb. Bu haqda bu gün, 28 iyun tarixində Bakuplus.az Baku TV-yə istinadən məlumat verir.
Məsələ ilə bağlı Bakı şəhər “Lift Təmir” İB-dən bildirilib ki, sözügedən binanın lift probleminin həlli onun inşaat işlərini həyata keçirən MTK-nın səlahiyyətindədir.
“Binanın tikintisi 1992-93-cü illərdə başlayıb, 1994-cü ildə müharibə şəraiti ilə əlaqədar liftlərin qoyulması baş tutmadı. 30 ildən çoxdur binanın sakinləri yuxarı mərtəbələrdən özləri düşüb, özləri qalxırlar. O cümlədən 180 mənzilin sakini bu vəziyyətdə yaşayır. Nazirlər kabineti, FHN, Bakı ŞİH bu barədə artıq akt tərtib ediblər ki, bina qəzalıdır, sökülüb təzədən tikilməlidir”, - deyə MTK sədri Yaşar İsmayılov söyləyib.
Məsələyə Yasamal Rayon İcra Hakimiyyətindən (RİH) də aydınlıq gətirilib. Bildirilib ki, Sovetlər Birliyinin dağılması səbəbindən sözügedən yaşayış binasının 6 girişi 9-cu mərtəbə səviyyəsində, 4 girişi isə 6-cı, 7-ci mərtəbələr səviyyəsində olarkən tikinti işləri dayandırılıb. Bina yarımçıq qaldığından liftlər də quraşdırılmayıb. Bununla belə mənzil sahibləri və məcburi köçkün ailələri orada məskunlaşıblar. Ancaq 2019-cu ildə 10 blokdan ibarət binanın 1, 2, 3 və 4-cü bloklarının sökülməsi, digər blokların isə əsaslı təmir olunması və orada tamamlanma işlərinin aparılması FHN tərəfindən məqsədəuyğun hesab edilib.
Yasamal RİH isə binada yaranmış vəziyyətlə bağlı aidiyyəti dövlət qurumlarına müraciətlər edib və rayon ərazisində yerləşən qəzalı binalar siyahısına Yeni Yasamal 2 yaşayış sahəsi, 10 saylı ünvanda tikintisi yarımçıq qalmış yaşayış binası da daxil edilib. Yalnız müvafiq qərar qəbul edildikdən sonra binanın taleyinə də aydınlıq gətiriləcək.
