Bakının Yasamal rayonu, Şəhid Kamal Rəhimov küçəsində yerləşən 30-cu binanın sakinləri 11 aydır istiliksiz qalırlar. Bu haqda bu gün, 1 dekabr tarixində Lent.az məlumat verib.
Bina sakini Ağa İsmayıl Əsədov şikayətində bildirib ki, ötən il Abbas Mirzə Şərifzadə küçəsinin yaxınlığında su borusu partlayıb. Onun sözlərinə görə, nəticədə ev sakinləri bu ilin yanvar ayından istiliksiz qalıblar:
“Bununla bağlı sahə rəisinə müraciət etdik. Həmin nasazlıq bərpa olundu. Bir gündən sonra boru yenidən partladı. Yenidən gəlib düzəltdikdə bizə 1 saatdan sonra istiliyin veriləcəyi deyilmişdi. İdarənin mühasibatlığı ilə əlaqə saxlayanda isə istiliyin verilməyəcəyini qeyd etdilər. Binanın istilik sistemindən kənarda qaldığını və nasazlığın bərpa edilməsinin mümkün olmadığını, bununla bağlı Azərbaycan Avtomobil Yolları Dövlət Agentliyinə (AAYDA) müraciət edəcəklərini bildirdilər. Sakinlər olaraq AAYDA ilə əlaqə saxladıqda isə bu məsələ ilə bağlı heç bir müraciət olunmadığını dedilər. Burada 108 ailə yaşayır. Ətrafdakı binalara istilik xətti çəkilib. Lakin 11 aydır yaşadığımız binaya istilik verilmir”.
“Azəristiliktəchizat” ASC-nin mətbuat katibi Elvin Basqallı bildirib ki, bu binada iki ciddi problem var. Onun sözlərinə görə, sözügedən binanın yerləşdiyi küçədən müxtəlif kommunikasiya xətləri keçir: “Bu baxımdan orada işlər əl ilə aparılmalıdır. Belə olduqda küçə 4-5 gün ərzində bağlı qalmalıdır. Bu çox ciddi problemdir. Digər problem isə həmin binanın istiliyi magistral xətdən almasıdır. Yəni həmin binanın istiliklə təmin olunması digər binalara verilən istilik xidmətinin keyfiyyətinə mənfi təsir göstərir. “Azəristiliktəchizat” ASC tərəfindən problemlə bağlı müvafiq addımlar atılır. Aidiyyəti qurumlara müraciət olunub. Veriləcək cavaba uyğun gələcəkdə hər hansı bir addım atıla bilər”.
