Yasamal rayonu, Akim Abbasov küçəsində insanlar bərbad şəraitdə yaşayırlar. Bu haqda bu gün, 6 aprel tarixində Bakuplus.az ATV-yə istinadən xəbər verir.
Həkimlərin Təkmilləşdirmə İnstitutunun keçmiş yataqxanası olan binada uzun müddətdir ki, keçmiş məcburi köçkünlər məskunlaşıblar. Bərbad şəraitdə olan və istismar müddətini başa vuran binada su xətləri yararsız hala düşüb və evlərə su sızmağa başlayıb.
“24 saat dayanmadan su israf olunur. Hər yerdə qısaqapanma olur. 1 ilə yaxındır hara gedirik, baxan yoxdur”, – deyə sakinlər bildirirlər.
“Azərsu” ASC-dən bildirildi ki, yataqxanada yaranan problemə görə onlar cavabdeh deyillər. Bina hansı qurumun balansındadırsa, problemlə bağlı həmin dövlət qurumuna müraciət olunmalıdır. Qaçqınların və Məcburi Köçkünlərin İşləri üzrə Dövlət Komitəsindən isə qeyd olundu ki, problem haqda məlumatlıdırlar və ərazidə araşdırma aparılacaq.
