Bakının Yasamal rayonunun Ələsgər Ələkbərov küçəsində köhnə mənzillər sökülərək yerində çoxmərtəbəli bina ucaldılır. Tikinti işləri aparıldığı ərazinin yaxınlığında isə hələ də yaşayış var. Sakinlər deyirlər ki, gecə-gündüz aparılan tikinti işləri nəticəsində mənzilləri qəzalı vəziyyətə düşüb. Bu haqda bu gün, 13 iyun tarixində Bakuplus.az ATV Xəbər-ə istinadən məlumat verir.
Sakinlərin sözlərinə görə, ərazidə yaşayan bəzi ailələr razılaşma yolu ilə oradan çıxarılıb və evləri sökülüb. Ancaq bəzi ailələrlə razılaşma əldə edilmədiyindən onlar evlərini tərk etməyiblər. Sakinlər iddia edirlər ki, yaxın ərazidə “Lux Residence” şirkəti tərəfindən görülən işlər zamanı onların evinə az-çox zərər dəyib. Xüsusilə mənzillərin divarlarında müxtəlif çatlar yaranıb.
Məsələ ilə bağlı adıçəkilən tikinti şirkətindən bildirildi ki, bu ərazi Bakı Şəhər İcra Hakimiyyətinin (ŞİH) 2020-ci ilin sərəncamı əsasında bina tikintisi üçün ayrılıb. Ərazidə olan 150-yə yaxın köhnə və qəzalı vəziyyətdə olan mənzillər razılaşma yolu ilə sahiblərindən alınıb və evləri sökülüb. Evlərində qalan 10-a yaxın ailə onlara təklif olunan heç bir şərtlə razılaşmaq istəmir. Əksinə, bazar qiymətindən daha çox pul tələb edirlər. Tikinti işləri zamanı onların evlərinin qəzalı vəziyyətə düşməsinə gəlincə isə şirkət onu təkzib edir.
“Bakı ŞİH-nin 2020-ci ildə verdiyi sərəncamından əvvəl aidiyyəti qurumların ərazidə yerləşən mənzillər haqqında rəyi var. Qəzalı olması haqqında da müvafiq rəylər, fotoşəkillər, görüntülər var. Bizim tikinti apardığımız ərazi yaşayan sakinlərin mənzillərindən xeyli aralıdadır və mənzillərə tikinti tərəfindən heç bir xəsarət, qəza törədilməyib”, - tikinti şirkətinin direktoru Rəfail Mirzəyev deyib.
Məsələ ilə bağlı Yasamal RİH-dən isə qeyd edildi ki, ərazidəki evlər yalnız sakinlərlə razılıq əldə olunduqdan sonra sökülə bilər. Tərəflər arasında bu və ya digər səbəbdən yaranan mübahisə nəticəsində razılaşma mümkün olmasa, onların evləri sökülə bilməz.
