Yasamal rayonunda yerləşən uşaq bağçasından uşaqlar zorla çıxarılır. Bu haqda bu gün, 26 yanvar tarixində Bakuplus.az Xəzər Xəbər-ə istinadən məlumat verir.
Bildirilir ki, 345 saylı uşaq bağçasında bir neçə ildir təlim-tərbiyə alan azyaşlılar yanvar tədris prosesisinin ortasında bağçadan çıxarılırlar. Valideynlərə deyilib ki, övladları elektron qaydada qeydiyyatdan keçirilmədiyi üçün heç bir sənəddə adları yoxdur.
“2 gündür bizə deyirlər ki, uşağımız qeyri-qanuni şəkildə buradadır. Buna görə də övladımızı bağçadan çıxarmalıyıq”, – deyə valideynlər vurğulayırlar.
Onların sözlərinə görə, keçmiş müdiriyyət uşaqları onlayn qeydiyyatdan keçirməyib. Valideynlərin isə belə bir prosesin varlığından xəbərləri olmayıb.
Bakı Şəhəri üzrə Təhsil İdarəsindən məsələ ilə bağlı bildirilib ki, sözügedən bağçada araşdırma aparılıb və onlayn qeydiyyatdan keçməyən uşaqlar bağçadan uzaqlaşdırılıblar. Azyaşlıların yeni qrupa yerləşdirilməsi və ya yaxınlıqdakı bağçalara yönləndirilməsi barədə mövzular müzakirə olunur.
