Paytaxtın Yasamal rayonu, Həsən Məcidov küçəsində yollar bərbad vəziyyətdədir.
Bununla bağlı Bakuplus.az-a müraciət edən sözügedən küçədə 7A binasında yaşayan sakininin sözlərinə görə, dəfələrlə şikayət olunsa da, aidiyyəti qurumlar məsələyə laqeyd yanaşır.
“Baxmayaraq ki, bura şəhərin mərkəz hissələrindən biridir. Ancaq nə Yasamal rayonu İcra Hakimiyyəti, nə Mənzil Kommunal İstismar İdarəsi, bir sözlə heç bir aidiyyəti qurum bu əraziyə yaxın durur. Burada yollarımız çox bərbad vəziyyətdədir. Yağış yağanda böyük gölməçələr yaranır və həftələrlə qurumur. Yağmursuz havalarda toz-torpaq evlərimizə dolur. Heç yerdə işıqlandırma yoxdur”.
Şikayətçi həmçinin yaşayış binaları ətrafında sakinlər üçün nəzərdə tutulmuş sahələrin kiminsə şəxsi vəsaiti hesabına alınaraq özəlləşdirdiyini bildirib.
“Kimsə bu həyətin böyük bir hissəsini, yəni stadionu, uşaqların oynadığı, yaşlı insanların dincəldiyi sahələri şəxsi vəsaiti hesabına alaraq özəlləşdirib. Artıq 10 ildən çoxdur ki, belədir. Bu azmış kimi özəlləşdirdiyi sahəni çox səliqəsiz şəkildə hasara alıb, ətrafinı isə yararsız vəziyyətə salıb”, - deyə şikayətçi bildirib.
Məsələ ilə bağlı Yasamal rayonu İcra Hakimiyyətinə sorğu göndərsək də, cavab ala bilmədik. Həmçinin Azərbaycan Avtomobil Yolları Dövlət Agentliyi (AAYDA) ilə əlaqə saxlamağa çalışsaq da, zənglərimiz cavabsız qalıb.
