Yasamal rayonu, İnşaatçılar prospektində yerləşən qazanxanadakı partlayışdan sonra bir sıra yerlər istiliksiz qalıb. Bu haqda bu gün, 22 fevral tarixində Bakuplus.az ARB-yə istinadən xəbər verir.
422 saylı qazanxada partlayış 2 həftə əvvəl baş vermişdi. Hadisədən sonra 20-yə yaxın yaşayış binası və bağça istiliksiz qalıb.
11 saylı körpələr evi-uşaq bağçasının istiliyi 2 həftəyə yaxındır yoxdur. Valideynlərin sözlərinə görə, elektrik qızdırıcılarından istifadə olunur, ancaq bu, kifayət etmir.
“Uşaqları çox isti geyindiririk ki, xəstələnməsinlər. Deyirlər ki, ayın sonunda istilik veriləcək. Biz də gözləyirik”, – deyə sakinlər bildirirlər.
“Azəristiliktəchizat” ASC-dən məsələ ilə bağlı bildirilib ki, hazırda araşdırmalar aparılır. Ekspertiza işləri yekunlaşdıqdan sonra addımlar atılacaq.
