Paytaxtın Xətai rayonu, General Şıxlinski küçəsində yerləşən doqquzmərtəbəli binanın sakinləri 7 gündür ki, kəskin su qıtlığı yaşadıqlarını iddia edirlər. Bu haqda bu gün, 10 avqust tarixində Bakuplus.az Xəzər Xəbər-ə istinadən məlumat verir.
Vətəndaşların sözlərinə görə, adətən suyun verilməsi qrafikə uyğun aparılır. Lakin su vaxtında verilmir, təzyiq aşağı olduğundan yalnız aşağı mərtəbələrə çatır.
Rayonun Sukanal İdarəsinin baş mühəndisi Əbülfəz Mamoyev qeyd edib ki, hazırda göstərilən ünvanda sayğaclar yoxlanılır. Suya qənaət etmək üçün isə binaya qrafik üzrə su verilir. Mamoyevin sözlərinə görə, su gündüz beş saat, axşam isə dörd saat verilir.
O, əlavə edib ki, sakinlərin əksəriyyəti binanın damına çənlər quraşdırıb və su birbaşa bu çənlərə doldurulur. Bu da öz növbəsində binaya suyun tam təzyiq altında verilməsinə problem yaradır.
