Paytaxtın Suraxanı rayonu, Yeni Günəşli qəsəbəsi, D massivi, 29 ünvanında sakinlər qaz problemi yaşayırlar. Bu haqda bu gün, 2 mart tarixində Bakuplus.az Real TV-yə istinadən xəbər verir.
Onmərtəbəli binanın bütün mərtəbələri qazla təchiz olunsa da, 1-ci mərtəbəsinə qaz xətti çəkilməyib. Bu səbəbdən də sakinlər qaz balonlarından istifadə etməyə məcbur olurlar. Bu da həm həyati təhlükə yaradır, həm də baha başa gəlir.
“15 ildən çoxdur burada qalırıq. 14-15 ailə yaşayır. Biz çatdıra bilmirik və qorxuruq. Elektriklə isə çox baha olur”, - deyə sakinlər bildirirlər.
“Azəriqaz”dan məsələ ilə bağlı bildiriblər ki, sözügedən bina əvvəl yaşayış üçün nəzərdə tutulmadığından, həmçinin birinci mərtəbələr əvvəllər iaşə obyektləri olduğundan ora tam olaraq qaz çəkilməyib. Sakinlər müvafiq sənədlərlə müraciət etsələr, qurum bununla bağlı addımlar atacaq.
