Bakının Suraxanı rayonu, Yeni Günəşli, AB massivi, 127 saylı 9 mərtəbəli binanın zirzəmisinə kanalizasiya suyu dolub. Bu haqda bu gün, 23 yanvar tarixində Bakuplus.az ATV Xəbər-ə istinadən məlumat verir.
Sakinlərin sözlərinə görə, binanın blokuna daxil olmaq az qala mümkünsüzdür, üfunətdən nəfəs almaq olmur. Qış olmasına baxmayaraq, burada ağcaqanad əlindən tərpənmək olmur.
Suraxanı rayonu Sukanal İdarəsinin baş mühəndisi Mehman Həşimov bildirdi ki, həmin binadan şikayət daxil olmayıb, lakin müraciətdən sonra problem həll olunacaq. Əraziyə yaxın zamanda təmir briqadası cəlb olunaraq zirzəmidə olan su sızıntısı aradan qaldırılacaq.
Baş mühəndis, həmçinin bildirdi ki, mütəxəssislər tərəfindən kanalizasiya xətlərinə yenidən baxış keçiriləcək. Bu xətlərin yenilənməsinə ehtiyac yaranarsa, proses gecikdirilmədən təmin olunacaq.
