Ənənəvi olduğu kimi, bu il də qarşıdan gələn Yeni il bayramı ilə əlaqədar Bakının bir sıra ərazilərində bayram yarmarkaları təşkil olunub. Metro stansiyalarının qarşısında qurulan yarmarka çadırları yanvarın əvvəlinə kimi fəaliyyət göstərəcək. Bu haqda bu gün, 7 dekabr tarixində Bakuplus.az məlumat verir.
Bayram yarmarkaları metronun "Neftçilər", "Gənclik", "İnşaatçılar, "Nəriman Nərimanov", ''Azadlıq'' stansiyalarının yaxınlığında və şəhərin digər ərazilərində quraşdırılıb. Satış səhər saat 08:00-dan gecə 00:00-dək davam edəcək.
Şəhər sakinlərinin sözlərinə görə, yarmarkalarda mağazalarla müqayisədə qiymətlər daha münasibdir. Yeni ilin əsas atributu olan küknar ağacı burada 40-150 manat dəyərində satılır. Balaca stolüstü “yolkalar”ın qiyməti isə 4-5 manatdan başlayır.
Yarmarka çadırlarında çələnglərin və yeni il bəzəklərinin qiyməti 70 qəpikdən 3 manata qədərdir. Rəngli işıqların qiyməti 3-8 manat arasında dəyişir, bəziləri 30 manata da satılır. Ən ucuz yumşaq oyuncaqların qiyməti 1 manat 50 qəpik, ən bahaların isə 30 manata yaxındır.
Hazırda şəhərin mərkəzində, həmçinin “Soyuq əllər, isti ürək” xeyriyyə yarmarkası fəaliyyət göstərir.
[URIS id=82161]
