Paytaxtın Sabunçu rayonu, Yeni Ramana qəsəbəsində ictimai nəqliyyatla bağlı problem yaranıb. Bu haqda bu gün, 13 dekabr tarixində Bakuplus.az Baku TV-yə istinadən məlumat verir.
Yerli sakinlərin sözlərinə görə, əraziyə yalnız 214 saylı avtobus gedir. O da axşam saat 8-ə kimi fəaliyyət göstərir.
“Axşam saat səkkizdən sonra məcbur olub taksi sifariş edirik. Yağışlı günlərdə uşaqlarımız çətinlik çəkirlər. Marşrut xətləri uzadılmalı, qəsəbəyə yeni avtobuslar verilməlidir”, – deyə vətəndaşlar gileylənirlər.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, yoxlama nəticəsində marşrut xəttinin fəaliyyətinin müəyyən edilmiş iş qrafikindən tez dayandırılması halları müəyyən edilib.
“Bununla bağlı daşıyıcıya xəbərdarlıq olunub. Marşrut üzrə avtobus sayının sərnişin tələbatına uyğun istismar olunmayacağı və xəttin nizamlı təmin edilməyəcəyi təqdirdə marşrutun müsabiqəyə çıxarılması nəzərdə tutulub”, – deyə qurumdan bildirilib.
