Paytaxtın mərkəzi hissəsində olan yeni tikililərdə tez-tez təmir-bərpa işləri aparılsa da, Bakıətrafı qəsəbələrdə vəziyyət o qədər ürəkaçan deyil. Hündürmərtəbəli binaların üzlüyü qopub, dağılıb, elə hissələr var ki, çat verib. Bu haqda bu gün, 19 iyun tarixində Bakuplus.az ATV-yə istinadən məlumat verir.
Vətəndaşlar deyirlər ki, bəzi binalara nəzarət edilmir. Onlar hesab edirlər ki, bu işlərə komendant cavabdehdir.
Çəkiliş zamanı yeni tikililərdən birinin sədrindən binanın üzlüyünün niyə təmir edilmədiyini soruşan jurnalistləri aldıqları cavab təəccübləndirdi. “Siz elə bilirsiniz ki, bir dənə həyətin qapısını rəngləməklə bitir? Mütəxəssisləri çağırmışıq, demişik. 60 min manat pul tələb olunur. Bizim o qədər pulumuz yoxdur”, – deyə xanım olan sədr bildirib.
Əmlak eksperti Elnur Fərzəliyev deyir ki, binaların tikintisi başa çatdıqdan sonra sakinlər öz aralarından idarəedici şəxs seçməlidirlər. Yəni bu işi, binanı tikən şirkətə həvalə etməli deyillər.
“Çoxmənzilli binalar inşa olunarkən əvvəlki illərdə həmin binaların idarə olunması inzibatçı, yəni komendant tərəfindən aparılsa da, indi mövcud qanunvericiliyə əsasən, bina tikilib təhvil verildikdən sonra sakinlər tərəfindən mənzil mülkiyyətçi müştərək cəmiyyəti qurulmalıdır və bütün binanın idarə olunması, kommunal xərclərin toplanılması və təyinatı üzrə xərclənməsi bina sakinlərinin öz öhdəliyinə düşür. Bundan əlavə, bina sakinləri hər hansı bir idarəedici şəxs idarəetməni düzgün formada aparmırsa, bina sakinləri həmin şəxsi başqa bir şəxslə dəyişmək səlahiyyətinə malikdirlər”, – deyə ekspert əlavə edib.
Fərzəliyevin sözlərinə görə, gələcəkdə yaşayış məntəqələri ilə bağlı vahid struktur formalaşmalıdır.
İndiki halda görünən odur ki, yeni tikililərdə qarışıq bir vəziyyət var. Komendant adlandırılan şəxs binaya nəzarət etmir ya da dırnaqarası nəzarət edir. Bu isə acı reallıqdan xəbər verir. Həmin binalara baxım bərbad haldadır.
