Yasamal rayonu, Yeni Yasamal 1, Məhəmməd Xiyabani, 212-244 ünvanında 12 bloklu binanın həyəti zəbt olunub. Bu haqda bu gün, 6 mart tarixində Bakuplus.az Real TV-yə istinadən xəbər verir.
12.000 sakinin yaşadığı 0,5 hektar sahədə həm mağazalar, həm qarajlar, həm də istifadəsiz köşklər var. Qaraj sahibləri digər avtomobilləri obyektin qarşısında saxlamağa icazə vermirlər. Bu səbəbdən də insanlar maşınlarını məhəllədaxili yollarda park edirlər.
“Burada adamın oturmağa yeri də yoxdur. Uşaqlar harada oynasın? Bir nəfər yoldan keçənin halı pisləşsə oturmağa yeri yoxdur”, – deyə sakinlər şikayət edirlər.
33 ildir inşa olunan binanın sakinləri öz hesablarına hər hansı yaşıllıq salmaq istəsələr də, onları suvarmaq üçün su xətləri belə yoxdur.
Burada yaşayan professor Misirxan Talıbov deyir ki, onun Rumıniyadan gələn dostu bu məhəlləni görəndə o xəcalət çəkib.
“Bakının gözəl yerlərindən gəldi düşdü bu həyətə. Baxır ki, məhəllə nə gündədir. Mən utandığımdan bilmədim, nə edim”, – deyə M.Talıbov vurğulayıb.
Yasamal rayon MKTİB-dən məsələ ilə bağlı bildirilib ki, həyətdəki tikililər burada abadlıq işlərinin aparılmasına imkan vermir.
“Rəsmi xəbərdarlıq edilmişdi ki, tikili oradan götürülsün. Ancaq heç kim buna məhəl qoymur. Tikililər söküldükdən sonra ərazidə abadlıq işləri görülə bilər”, – deyə qurumdan əlavə edilib.
