Uzun müddət istifadə olunduğu üçün köhnələn və ya zədələnən pullar tədavülə yararlıdırsa, Mərkəzi bank və kommersiya bankları tərəfindən dəyişdirilir. Lakin bu qayda xarici valyuta üçün nəzərdə tutulmayıb. Ləkələnən xarici əsginasları, demək olar ki, heç bir bank götürmür. Bu haqda bu gün, 29 noyabr tarixində Bakuplus.az ATV-yə istinadən məlumat verir.
Maliyyə məsələləri üzrə ekspert İsmayıl Məmmədovun sözlərinə görə, dollar valyutası onu tədavülə buraxan “M&T” bankı tərəfindən keçirilir. Bu bank isə Azərbaycan maliyyə bazarında təmsil olunmayıb. Bu səbəbdən digər banklar üçün bu cür zadələnmiş əsginaslar əlavə lüzumsuz xərclərə səbəb olur.
Təkcə banklar deyil, poçt məntəqələri də ləkəli və zədəli xarici valyutanı götürməkdən imtina edir.
“Çalışırıq ki, vətəndaşların təlabatına uyğun olaraq yalnız səliqəli və zədəsiz xarici valyutaların mübadiləsini təmin edək. Müştərilər tərəfindən çox vaxt ləkəli və ya zədələnmiş xarici valyuta, o cümlədən dollar əsginasları qəbul edilmir. Belə olduğu halda isə həmin ləkəli və zədələnmiş valyuta daxildə qalır və onların xarici banka daşınması da əlavə xərc yaradır”, – deyə “Azərpoçt”un şöbə müdiri Afaq İbrahimova bildirib.
Vəkil Mircavid Miriyev isə bildirib ki, qanunvericilikdə çirklənmiş, zədəli və keyfiyyətini itirmiş xarici valyutada olan pul nişanları ilə bağlı banklara hər hansı öhdəlik və ya məsuliyyət tədbirləri müəyyən edilməyib.
Hazırda ölkəmizdə zədəli xarici pulları qəbul edən kommersiya bankları çox azdır. Onlar da valyutanı müəyyən komissiya haqqı tutmaqla qəbul edirlər.
