Zığ kəndində kanalizasiya problemi sakinləri narahat edir. Bu haqda ARB Tv reportaj hazırlayıb.
Kanalizasiya və çirkab suları əraziyə axıdıldığına görə havanın isti olduğu günlərdə burada dözülməz üfunət qoxusu yaranır.
Sakinlər deyir ki, kəskin qoxu ən çox isti aylarda hiss olunur:
“Yağıntılı günlərdə isə başqa problem üzə çıxır. Yağış olanda mənim həyətimdəki quyu su ilə dolur. Sonra isə mənim evimin içinə gəlib çıxır. 25 santimetr su olur həyətdə”.
Problemin nə vaxt həll olunacağı ilə bağlı Suraxanı rayon İcra Hakimiyyətinin baş məsləhətçisi Ramin Salmanlı açıqlama verib: “İcra Hakimiyyətinin məlumatı var və həmin ərazidə yığılan suların daşınması ilə bağlı mütəmadi olaraq Sukanal İdarəsi tərəfindən işlər həyata keçirilir. Kanalizasiya şəbəkəsi olmayan ərazi 2019-2023-cü illər tədbirlər planına əlavə olunmuşdur və Zığ qəsəbəsində yeni kanalizasiya xəttinin çəkilməsinin tədbirlər planına əsasən “Azərsu” tərəfindən mərhələli formada həyata keçirilməsi nəzərdə tutulmuşdur”.
“Azərsu” ASC-dən də deyilənlər təsdiqlənib. Bildirilib ki, məsələdən xəbərdardırlar və əraziyə mütəmadi olaraq nəzarət edirlər.
“2022-ci ilin layihəsində həmin ərazidə kanalizasiya xətləri nəzərdə tutulmayıb. Amma Abşeron yarımadasının baş planında bütün ərazilərdə, o cümlədən Zığ qəsəbəsində mərkəzləşdirilmiş su və kanalizasiya xətlərinin yenidən qurulması öz əksini tapıb”, - deyə Azərsunun mətbuat katibi Anar Cəbrayıllı qeyd edib.
