Bakının mərkəzindən təxminən 10-12 km məsafədə, Hövsan yolunun kənarında, Zığ qəsəbəsində yerləşən duzlu göl və onun ətrafında antisanitar vəziyyət müşahidə olunur. Orada çimmək qadağan edilsə də, bir çox insanlar xəstəliklərinə çarə tapacaqlarını düşünərək hələ də bura üz tutmaqdadırlar. Bu baradə bu gün, 18 iyul tarixində Bakuplus.az AZTV-yə istinadən məlumat verir.
Ərazidə “Göldən istifadə qadağandır” yazısı olsa da, bura gələnlərin maşınlarını saxlaması üçün pul ödənişi tələb olunur. Girişdən sonrakı mənzərə isə qamışlıq, boş su qabları, selofan torbalar və yemək tullantılarından ibarətdir. Ətrafdakı insanların paltarlarını dəyişmələri üçün taxtalardan tikililər yaradılıb. Bu otaqlarda da antisanitar vəziyyət hökm sürür.
Rəsmi qurumlar göldə monitorinqlər zamanı çırkab suların axıdılması faktını aşkar etdiklərini və göldən istifadənin insan sağlamlığına zərəli olduğunu bildiriblər.
Gölün ətrafına məişət tullantıları atılır. Buna səbəb isə ətrafda tullantı konteynerlərinin sayının azlığıdır.
Aidiyyəti qurumun nümayəndəsinin sözlərinə görə isə Zığ qəsəbəsindəki duzlu gölün ərazisində mütəmadi olaraq Xətai rayon İcra Hakimiyyət (RİH) Zığ bələdiyyəsi tərəfindən təmizlik işləri aparılır, ərazi nəzarətdə saxlanılır.
Həkim-revmatoloq Aygün Əhmədli isə bildirir ki, Masazır, Məmmədli və Zığ göllərindən yayda duz çıxarıldığına görə el arasında onlar duzlu göl kimi tanınır. Əslində isə, həmin göllərdən çıxarılan gil palçığı böyük müalicəvi əhəmiyyət kəsb edir. Ancaq buradakı suyun təmizliyinin qorunub saxlanılmaması və gigiyenik şəraitsizlik insanlarda digər xəstəliklərin yaranmasına gətirib çıxara bilər.
Reportaj apardıqdan sonra ərazisində bəzi dəyişikliklər olub.
Suraxanı RİH-nin məsul işçisi həmçinin əlavə etdi ki, ərazidə 200-dən çox işçi abadlıq işləri ilə məşğuldur. Buradan 100 kuba yaxın məişət tullantısı yığılaraq təmizlənmişdir. Gələcəkdə buranın təsdiq olunmuş plana uyğun olaraq abadlaşdırılması nəzərdə tutulmuşdur.
ETSN-nin mütəxəssisləri duzlu göldə su və palçıq testləri götürüblər. Ərazidə xəstəlik mənbəyinə çevrilən paltardəyişmə otaqları söküldü. Göl istifadəsi üçün aparılan monitorinqlərin cavabı isə bir həftə sonra açıqlanacaq.
