Zığ qəsəbəsindən metronun “Qara Qarayev” stansiyasına hərəkət edən 44 nömrəli marşrut xəttinə yeni avtobuslar verilsə də, sakinlər avtobus fəaliyyətindən narazıdırlar. Bu haqda bu gün, 10 oktyabr tarixində Bakuplus.az Oxu.az-a istinadən məlumat verir.
“Avtobuslar son dayanacaqda düzülüb gözləyir. Ancaq 20-25 dəqiqə interval keçdikdən sonra gəlir. Bu ilin sentyabrından isə sınıq-sökük avtobuslar həmin xəttə buraxılıb”, – deyə sakinlər bildirirlər.
Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov cavab olaraq qeyd edib ki, xətdə 14 ədəd iritutumlu yeni nəsil avtobus fəaliyyət göstərir. İntervala gəlincə, gecikmələrə səbəb yollarda olan tıxaclar olur.
“BakuBus” MMC-nin istismarında olan bütün avtobuslar gündəlik yuyulub təmizləndikdən, dezinfeksiya edildikdən və texniki baxışdan keçirildikdən sonra xəttə buraxılır. Lakin gün ərzində sərnişinlərin marşrutlardan istifadəsi zamanı avtobusların çirklənməsi kimi hallar müşahidə edilir”, – deyə AYNA rəsmisi əlavə edib.
