Sabunçu rayonu, Zabrat qəsəbəsinin sakinləri zibillik içində yaşayırlar. Bu haqda bu gün, 14 oktyabr tarixində Bakuplus.az ARB-yə istinadən xəbər verir.
Belə ki, sakinlərin sıx məskunlaşdığı ərazidə çoxlu sayda məişət tullantıları mövcuddur. Bu da antisanitariyaya, üfunətə və həşəratların yığılmasına səbəb olur. Məktəbə gedən yol da buradan keçir. Bu isə uşaqları hər gün xəstəlik mənbəyindən keçməyə məcbur edir.
“Uşaqlar itlərin hücumuna məruz qalırlar. Qoxudan pəncərəni belə aça bilmirik”, – deyə sakinlər şikayət edirlər.
Zabrat qəsəbəsi inzibati ərazisi üzrə nümayəndəliyindən məsələ ilə bağlı bildirilib ki, vəziyyətin bu həddə çatmasında qurumun payı ola bilər, ancaq sakinlər də zibilləri özləri üçün rahat olan ərazilərə atırlar. Bu da tullantıların yayılmasına səbəb olur.
Qurum rəsmisi narazılığa səbəb olan problemin yaxın vaxtda həll olunacağını qeyd edib.
