Paytaxtın Sabunçu rayonu, Zabrat qəsəbəsində 10 illik binanın zirzəmisi su içindədir. Bu haqda bu gün, 5 may tarixində Bakuplus.az ATV-yə istinadən xəbər verir.
Ruslan Göyüşov küçəsində yerləşən bina 2013-cü ildə istismara verilib. Bir müddət sonra binanın zirzəmisinə su dolub və bina, demək olar, gölün üstündə dayanıb.
Ətrafa yayılan kəskin qoxu, ağcaqanadlar, kiflənmə və nəmlik - bunlar hamısı sakinləri uzun illərdir narahat edir. Onlar kimə müraciət etsələr də, heç kim məsələni həll etmir.
“Azərsu” məsələ ilə bağlı bildirib ki, bina çökəklikdə inşa olunduğundan zirzəmiyə mütəmadi su dolur. Həmin binaya nasos quraşdırılıb və müntəzəm olaraq su zirzəmidən çəkilir.
Aydın olur ki, Zabratda mərkəzləşdirilmiş kanalizasiya şəbəkəsi qurulanadək sakinlər bu problemlə yaşayacaqlar.
