Paytaxtın Sabunçu rayonu, Zabrat qəsəbəsində çirkab sular ağacların olduğu sahəyə boşaldılır. Bu haqda bu gün, 23 noyabr tarixində Bakuplus.az ATV-yə istinadən xəbər verir.
Çirkab sular yük avtomobilləri ilə Əncirlik adlanan əraziyə gətirilərək bura boşaldılır. Sakinlərin sözlərinə görə, sürücülər ərazidə olan ağacları qurutmaq üçün qəsdən bu əməli törədirlər.
“Üfunətdən durmaq olmur, uşaq çıxarmaq olmur, ağacların hamısı quruyur. Sürücülərə deyəndə də mübahisə etməyə başlayırlar”, - deyə sakinlər şikayət edirlər.
İcra Hakimiyyətindən məsələ ilə bağlı bildiriblər ki, bununla bağlı onlar məsuliyyət daşımırlar. Ekologiya Nazirliyindən isə qeyd olunub ki, araşdırmaya başlayıblar və yaxın zamanda müvafiq addımlar atılacaq.
