Bakının Sabunçu rayonu, Zabrat qəsəbəsi, Ruslan Göyüşov küçəsi, 106 ünvanında heç kimin yaşamadığı evdən qaza görə pul tələb edirlər. Bu haqda bu gün, 25 yanvar tarixində Bakuplus.az ATV News-a istinadən xəbər verir.
Ev sahibi Aysel İsgəndərovanın iddialarına görə, o, 7 ildir bu ünvanda yaşamır, amma buna baxmayaraq, qazın istifadəsinə görə 140 manat borc gəlib. Əlavə olaraq, yaxın zamanlarda həmin evə məxsus olan qaz sayğacı oğurlanıb.
Aysel İsgəndərovadan verilən məlumata əsasən, sonuncu dəfə mənzildə yaşayış 2017-ci ildə olub, amma ötən ilin mart ayından ona borc yazılmağa başlayıb.
“Azəriqaz” idarəsi ilə danışdım. Borcumuzla bağlı cədvəl göndərildi. Göstərir ki, guya orada qaz sərfiyyatı olub. Bunu da mənə sayğac oğurlanandan sonra deyiblər. Mənə necə sübut edə bilərlər ki, sayğac o sərfiyyatı yazıb?!” – deyə Aysel İsgəndərova vurğulayıb.
Qonşular da sözügedən ünvanda illərdir yaşayış olmadığını təsdiqləyiblər.
“Azəriqaz” İB-nin icitimaiyyətlə əlaqələr şöbəsinin rəisi Eldəniz Vəliyev bildirib ki, abonentin orada 7 il heç kimin yaşamadığı iddiası yanlışdır.
“2020-ci ildə abonent ödəniş edib. Bununla da sübuta yetiririk ki, orada yaşayış olub. Bizim xüsusi bazamız var ki, orada bütün məlumatlar qeyd olunub”, – deyə Vəliyev əlavə edib.
O, vətəndaşa məhkəməyə müraciət etməyi məsləhət görüb.
