Bakı bulvarının tarixi 1865-1868-ci illərdə memar Qasım bəy Hacıbababəyov tərəfindən salınmış sahil küçəsi ilə başlayır. 1865-ci ildə dəniz tərəfdən Bakı qalasının divarı sökülür. Qalanın daşlarından sahilin səkisi döşənir. Qafqaz təqvimində bu haqda belə yazılmışdır: “Sahil şəhəri dənizdən ayıran və havanın sərbəst hərəkətinə mane olan faydasız şəhər divarlarını əvəz etdi”. Bu sahil küçəsi Rusiya imperatoru II Aleksandrın adını daşıyırdı. [Кавказский календарь 1874 года]
1867-ci ildə bu ərazidə su kəməri çəkilmiş və burada Bakının ilk fəvvarəsi inşa edilmişdir.
7 aprel 1909-cu ildə mühəndis Məhəmməd Həsən Hacınski Bakı Şəhər Dumasının iclasında Dənizkənarı Bulvarın tikintisi ilə bağlı məsələni qaldırır. Milyonçu Hacı Zeynalabdin Tağıyevin maliyyə yardımı ilə tikinti işləri iki ilə başa çatır. İlk bulvar indiki Kukla teatrından “Azneft” meydanına qədər idi. 1910-cu ildə burada “Fenomen” adlı Bakının ilk kinoteatrı (indiki Kukla teatrı) tikilir. Bulvarda Qız qalası ilə üzbəüz çimərlik də yerləşirdi.
1930-cu illərdə sahildəki bir sıra körpülər söküldükdən sonra bulvarın ikinci hissəsi tikilir. Bulvarın ərazisi Kukla teatrından indiki Bülbül prospektinə qədər uzanır. Növbəti inkişaf mərhələsi 1936-1938-ci illərə təsadüf edir. Bu zaman artıq əks istiqamətdə – “Azneft” meydanından köhnə “İnturist” (indiki İntourist) mehmanxanasına kimi olan ərazidə işlər aparılır. [Рудольф Гиль. Приветъ изъ Баку (Архивные документы сквозь столетия). Баку-2014]
1936-cı ildə bulvarda paraşüt qülləsi tikilib. Lakin 1960-cı ildə burada insan ölümü baş verir və tikili saat qülləsi kimi fəaliyyət göstərməyə başlayır. 1961-ci ildə isə Bakı meri Əliş Ləmbəranski bulvarda “Mirvari” restoranını inşa etdirir. Bakı Venesiyası da merin göstərişi ilə həmin vaxt salınmışdır.
Bulvar 1998-ci ildə “Milli park” statusunu almışdır. 2012-ci ildə bulvar Dövlət Bayrağı Meydanına qədər uzadılmışdır. 2015-ci ildə bulvarın iki istiqamətdə genişləndirilməsi işləri başa çatmışdır. Birinci hissə Dövlət Bayrağı Meydanından Bibiheybət istiqamətində genişləndirilmişdir, digər hissə isə Dəniz Ticarəti Limanından “Bulvar” mehmanxanasına kimi uzadılmışdır. Hazırda Bulvarın uzunluğu 16 kilometr təşkil edir. [http://bulvar.gov.az/about/history]
