Müqəddəs Məryəm katolik kilsəsi Bakıda, Xətai rayonunda, İzzət Orucov küçəsi 2A ünvanında yerləşir. Bu kilsə Azərbaycan ərazisində fəaliyyət göstərən yeganə katolik kilsəsidir.
XX əsrin əvvəllərində bu adı daşıyan başqa kilsə var idi. O kilsə indiki Zərifə Əliyeva və Rəşid Behbudov küçələrinin kəsişməsində, Şəhriyar adına Mədəniyyət Evinin yerində yerləşirdi. Keçmiş kilsə iki qülləli baş fasada malik idi. Qüllələrin mərkəzində müqəddəs Məryəmin uşaqla birgə heykəli yerləşdirilmişdi. Bakılılar buranı “Polşa Kilsəsi” kimi də adlandırırdılar.
Köhnə kilsə 1909-1912-ci illərdə neft maqnatı-Rılskilər ailəsi və məşhur neft mütəxəssisi, polşalı mesenat Vitold Zqlenitskinin maliyyə dəstəyi ilə inşa edilmişdir. Kilsənin memarı polşalı İosif Kasperoviç Ploşko idi. Sovet dövründə 1934-cü ildə həmin kilsə dağıdılmış və onun yerində Dzerjinski adına klub (indiki Şəhriyar adına Mədəniyyət Evi) tikilmişdir.
2002-ci ildə Roma Papası II İohann Pavel Azərbaycana səfər etmişdir. Bu səfərdən sonra, 2003-cü ildə yeni Müqəddəs Məryəm kilsəsinin Polşa icması tərəfindən tikilməsinə icazə verilmişdir. Tikinti 2007-ci ilin fevralında yekunlaşmışdır və 7 mart 2008-ci ildə Azərbaycan prezidenti İlham Əliyevin və Vatikanın dövlət katibi kardinal Tarçizio Bertonenintin iştirakı ilə açılışı baş tutmuşdur.
Yeni kilsə Neapol Memarlıq Universitetinin professoru Pado Ruceyro və Bakı şəhərinin baş memarı Akif Abdullayevin layihəsi əsasında inşa olunmuşdur. Müqəddəs Məryəmin yeni heykəli isə azərbaycanlı heykəltəraş Hüseyn Axverdiyev tərəfindən hazırlanmışdır.
Hazırki Müqəddəs Məryəm kilsəsində eyni vaxtda 250-300 nəfər ibadət edə bilər.
2012-ci ildə Katolik kilsəsində Roma Papası II İohann Pavelin Azərbaycana səfərinin 10-cu ildönümünü qeyd edilmişdir. Bununla əlaqədar kilsəsinin möminləri üçün Müqəddəs Messa ibadəti icra olunmuşdur. Messanı Vatikandan Bakıya gəlmiş kardinal Fernando Filoni yerinə
yetirmişdir. Messadan sonra kilsənin həyətində tikilmiş Pastor Mərkəzinin açılış mərasimi baş tutmuşdur. Sonra kilsənin daxilində II İohann Pavelin Bakıya səfərinə həsr edilmiş memorial lövhənin açılışı olmuşdur.
Mənbələr:
