Bu gün Böyük Vətən müharibəsində tarixi qələbənin 78 illiyi qeyd edilir. Bakı şəhəri bu müharibədə düşmən üzərində qələbəni təmin edən həlledici yanacaq bazası kimi tanınmışdı. Lakin sovet ordusunun yanacağa olan tələbatının 70%-ni ödəyən Bakının rolu yalnız bundan ibarət deyildi. [Azər Nuriyev. Bakı – Qəhrəman şəhər. Kaspi. -2010. – 6 may. – S.4.]
Bu illərdə Bakıdan şəxsi əmanətlərdən müdafiə fonduna 15 kq qızıl, 952 kq gümüş, 320 milyon rubl köçürülüb. Cəbhəyə 1,6 milyon ədəddən çox zəruri mal və 125 vaqon isti paltar göndərilib. Stalinqrad, Stavropol və Krasnodar vilayətlərinə də əhəmiyyətli yardım - ərzaq, avadanlıq və pul göndərilib. Bakı müəssisələri Dnepr Su Elektrik Stansiyasının, Azov limanının və digər mühüm obyektlərin bərpasında iştirak ediblər.
Bu zaman şəhərdə yüksəkixtisaslı kəşfiyyatçı kadrların hazırlanması üçün Bakı Regionlararası Kəşfiyyat Məktəbi yaradılmışdır. Həmçinin burada Dzerjinski və Frunze adına hərbi-dəniz məktəbləri, Yeysk aviasiya hərbi-dəniz məktəbi, iki piyada və bir artilleriya məktəbi və başqa təhsil müəssisələri fəaliyyət göstərirdi. Bütün bu hərbi və dəniz məktəbləri Ordu və Hərbi Dəniz Qüvvələri üçün kadrlar hazırlayırdı. Çox vaxt Bakıda yerləşən və cəbhəyə göndərilən məktəblərin kursantlarından döyüş briqadaları yaradılırdı.
[Баку в Великой Отечественной войне — OurBaku]
Bakı zavodları 130 növ müxtəlif silah və hərbi sursat - minomyotlar, tank əleyhinə minalar, qumbaralar, təyyarə, tanklar üçün detallar və s. istehsal etməklə ön cəbhəyə işləyirdi. Elektrik enerjisi ilə təchizatına görə də şəhər SSRİ-də 3-cü yeri tuturdu.
[Rzalı R. Neftiylə döyüşən Bakının "Qəhrəman şəhər" adı daşıması tarixi ədalətin bərpası olardı. Azərbaycan.- 2010.- 8 may.- S. 13.]
Beləliklə, müharibənin başlanğıcından sonuna kimi cəbhə şəhəri olan Bakının bir çox sahələrdə xidməti böyük olmuşdur.
