Şahmat üzrə 16-cı dünya çempionu Maqnus Karlsen Bakıda keçirilən dünya çempionatının yarımfinalında Nicat Abasovla görüşdən sonra qidadan zəhərləndiyini bildirib. Bu haqda bu gün, 23 avqust tarixində Bakuplus.az beynəlxalq Şahmat Federasiyasının (FİDE) Mətbuat Xidmətinə istinadən məlumat verir.
Norveçli qrosmeyster Azərbaycanın paytaxtında keçirilən dünya çempionatının final mərhələsinin ilk oyununda 18 yaşlı hindistanlı Rameşbabu Praqnanandha ilə heç-heçə oynayıb. İkinci partiya bu gün, avqustun 23-də baş tutacaq.
İdmançının sözlərinə görə, o, iki gündür ki, yemək qəbul edə bilmir: “Normal vəziyyətdə, yəqin ki, bir az üstünlüyüm olacaqdı. Çünki bir gün istirahət edərdim. Rəqibim isə dünən çətin tay-breyk oynamalı idi. Amma son bir neçə gündə olduqca pis vəziyyətdə idim.
Nicat Abasovla oynayandan sonra qidadan zəhərləndim. Son iki günü yemək yeyə bilmirəm. Buna görə də çox sakit idim. Çünki əsəbi olmağa gücüm yox idi”.
