Bakıda keçiriləcək Şahmat üzrə Dünya Kubokunun loqosu təqdim olunub. Bu haqda bu gün, 5 iyul tarixində Bakuplus.az Şahmat Federasiyasına istinadən xəbər verir.
Loqoda Bakının əsas rəmzlərindən biri olan Qız Qalası və şahmatda top fiqurunun elementlərindən istifadə edilib.
Sayca 10-cu dəfə təşkil olunacaq Dünya Kubokunun açıq yarışında 206, qadınların mübarizəsində isə 103 şahmatçı iştirak edəcək. Yarışda dünyanın ən güclüsü sayılan Maqnus Karlsen, eləcə də Teymur Rəcəbov və Şəhriyar Məmmədyarov kimi qrosmeysterlər iştirak edəcəklər.
Kişilərin yarışında ilk üç yeri tutacaq şahmatçılar İddiaçılar Turnirinə vəsiqə qazanacaqlar. Yarışın ümumi mükafat fondu 2,5 milyon ABŞ dollarıdır. Dünya Kuboku səkkiz illik fasilədən sonra 2-ci dəfə Bakıda təşkil olunacaq. İlk dəfə mötəbər yarış 2015-ci ildə Azərbaycanda keçirilib.
