ASTA Futbol Akademiyası (Azerbaijan Sport Talents Academy) və İspaniyanın Barselona şəhərində yerləşən “Marset” Futbol Akademiyası arasında əməkdaşlıq müqaviləsi imzalanıb. Bu haqda bu gün, 30 iyun tarixində Bakuplus.az Report-a istinadən xəbər verir.
Müqaviləyə əsasən, Barselonadan gələn mütəxəssislər ASTA-nın təklif etdiyi yeniyetmələr arasında seçim edərək onları öz akademiyalarına aparacalqar. Azərbaycanlı yeniyetmələr qarşıdakı 4 il ərzində ASTA-nın maliyyə dəstəyi ilə “Marset” Futbol Akademiyasında məşq edəcəklər.
Hazırda ispaniyalı məşqçilər 2008-2009-cu il təvəllüdlü 50 istedadlı futbolçu arasında seçim edərək, onlardan təxminən 15-20-sini ölkələrinə aparacaqlar. Seçimlər 2 iyul tarixinə qədər Bakı Olimpiya Stadionunda Rivero Karlos Arias və Ragel Marmol Felipe tərəfindən aparılacaq.
2024 və ya 2025-ci ildə də Azərbaycanda növbəti seçimlərin aparılması planlaşdırılır. Həmin vaxt 2010-2011-ci il təvəllüdlü yeniyetmələrin seçimi keçiriləcək.
